Zomi- Where is God when I’m hurting?

Kathuak Laitak Topa’n

Hongkem Hiam?

Eite in ihthuakding ahilo buainate tawh akidim leitungah ihteeng hi. New Orleans khua tawh kigamla lo tuipigei ah zingsang phalvak tungin Hurricane (pingpei) hong nunga, mi tultampi si-in, tulza tampi takin inn leh lo neilo leh dawnding tui neiloin om uh hi. Innte leh neihlehlamte lengmang khin hi. Thakhatthu apiang natna, nupa kikhenna,  ata ahihkeileh zi/pasal si a innkuan kikhenna nisim in piang hi. Bangbang apiang zongin mimal in ihthuakna hangin ihkap ciat hi. Hihte banghang eitung hongpiang hiam, cih ihthei nuam hi.  Kathuak laitak Topa’n hong thei-in hongkem mah hiam?

Topa Jesu in leitungah aom lai-in hihbang dotna  singlamteh tungah nadong hi. “Kapa, Kapa banghangin hongtaisan na hi hiam?”(Mark 15:34). Lipkhaphuaitakin athuak nate a Pa in thei hi, ahizongin, athuaknate lamdang kisa hi. Laisiangtho in Jesu pen, “gimna leh natna athuak mi ahi hi,” ci hi (Isaiah 53:3).

Nathuak laitak nangawnin

Topa hongnai om hi.

Na thuakna anat mahmah laitakin Topa muantheih ding baihlo khading hi, ahizongin Topa’n nathuakna khempeuh thei hi. Aman hong kem hi. Amah gamla om ihsak laitakin hongnai om mahmah hi.  Thumaan ahihlam ihthei hi, banghanghiam, cihleh Jesu in hong kamciam hi, “Keimah in leitung beidong in note tawh ka om tawngtung ding hi” (Matt.28:20). Na thuak laitak in Topa nangtawh hong om hi. Topa’n ci hi, “Tuite nangap laitak nang tawh kong omkhawm dinga, gunte nakaan cianing tui-in hongtum loding hi” (Isaiah 43:2). Pasianin ihthuak laitak leh ihhaksatpen hunah hong ompih hi. Hong ompih takpi ahihleh banghangin khatpeuh hong semlo hiam?  Banghangin ihthuaknate hongveng sakpah lo hiam?

Pasian’ hong leptuahna omlo hileh ihomzia bangci siahuaiding, cih natheih hiam?  Eite’n siatna aomna leitungah ihteeng hi. Laisiangtho in, hih siatna pen Pasian’ langpangpa Dawi’ nasepna’ gah ahi buaina, sihnate tawh kipawl hi, ci hi. Ahizongin Laisiangtho kammal in, hih siatna asiahuai gawploh nadingin Pasianin len hi, ci hi. Mangmuhna sungah vantungmi li in leitung huihlite len a, vantungpan vantungmi khat in amaute tungah “huihte in leitung a sukkhak loh nadingin khahsuah kha kei un” ci-in ngen hi. Hih thupuak pen, siahuai taka Satan in eite hong suknopna pan Topa’n hongdal  na ahi hi.

Pasianin teelding theilo alunghihmawhna

Pasianin buaina khat nei hi.  Namuh bangin, alipkhaphuai siatna tawh akidim leitungah ihteeng hi. Satan in Pasian leh Ama hoihna langdona lianpi sungah hong khumcip hi. Amah in eite suksiatding hanciam a, ihlungdamna khempeuh susia hi. Pasian pen Satan sangin hatzaw ahihmanin atawpna ah hih buainate tung gualzo ding hi. Mawhna, siatna, leh haksatna khempeuh leitung vannuai pan akizungkalhkhiat ni hong tung ding hi. Ahizongin tu-in Satan in avangliatna tawh hong  nasak, thuaksak, sisak thei lai hi.

Pasian’ lunghihmawhna in, nang leh kei-in deihzawk teltheihna ah bangci-in Satan tungah gualzawhna ngahding, cih ahi hi. Ihmuh mahbangin, apha leh asia suakta takin ihteltheihna ah Pasianin athubul pen suahtakna eite ading hong koihsak takpinding ahi hi. Eite in Pasian lam ah aomding teelloin, suaktatak in alehlam ihteel nopman in Satan in gualzo khin hi. Amahin Pasian pen zawhthawhthu leh ama utbang bangin mite athu amangsak nuampa ci-in mawhsak khinzo hi. Amah in amah leh amah Pasian tawh kizakim in kisehtawm hi.

Banghang Kei?

Ih nuntakna sungah buaina leh natnate hongtun ciangin,  banghang kei? ci in ihkidot ngeina ahi hi.  Hih in thutanglo tawh kibang hi.  Midangte tungah buaina apian laitak banghangin pawlkhat bangmah thuakselo in om uh hiam? Tuahsiatna atuakkhawm pawlkhat in nuntakna abeidong athuak laitakin pawlkhat in bangmah ciselo in om thei hiam? Banghang? Banghangin Pasianin pawlkhatte adingin nalamdang bawla, pawlkhatte adingin bawllo hiam?

Tuabang dotnate adingin alungkimhuai taktak dawnna kip omlo hi. Ihphawkding in, atawpna ah nalamdang ie vangliatna leh hihbang hong  pianna ahangte Pasian’ khutsung bekah om hi. Aman azaipi mu a, nakhempeuh adik in bawlding hi. Laisiangtho gelhte khat in, “vantungah Pasian om a leitung ah nang om nahihmanin napau ding akilawm zahval paukei in” (Thuhilhsia 5:2), naci hi.

Tuabang dinmun ihtuahciangin, vantungah Topa tawh maitang kituah in ih dottheih hun mateng, Pasianin na khempeuh thei hi, cih ihmuang ding hi. Leitungah ihnunziate akipciangin tua thu ih-um theiding hi. Vantung pan hihleitung ih etkik theihciangin, eite ih lungkim ding hi, “eite tungah hong kilangding vangliattnate kangaihsut ciangin tulaitak ihthuak gimnate ngaihsut tham kasa kei hi” (Rom 8:18).

Pasianin Satan’  tona adawnkikna-in, atapa neihsun leitungah mibangin hongpian ding leh eite mawhna pan hong tatkhiat nadingin, singlamteh tungah sidingin hongsawlna tawh  angsung akhuallo itna hong lakkhia hi.

Tu-in fnang leh kei-in Pasian leh Satan kikal ah teelding ihnei hi. Satan in Pasian amawhsakna ah, Pasianin avangliatna zangin  mihingte zawhthawhthu tawh uk-hi, acih theihloh nadingin, ei le ei teeltheihna hongpia a, tua in thumaan leh maanlo suaktatakin teel,  cih ahi hi. Tua ahih manin suaktatak a ihteelna-in Topa adingin thupi mahmah hi.  Tua hi a, hih in Topa’ buaina thugui khat ahi hi. Suaktatak in teelthei ih hihleh siatna teel in midangte tung lauhuainate bawlding ihteel thei hi.

Suahtak na zangkhial

Mipawlkhat in siatna ateelna hangin angah natna leh thuaknate lamdang sak nang omlo hi. Nupi khanglai khat cancer natna tawh asihciangin, nupa akikhenciang, motor kitaihin naupang asihciang, ahang khatpeuh tawh na thuaksiatciangin, hih in Satan in Topa do tawntung lai ahihna leh khat veivei Satan in kidona ah zo ahih thu hong lak ahi hi.

Laisiangthoin hong telsak thu-in atawpna ah Topa’n galzo ding hi. Mangmuhna laibu sungah Jesu in sakolkaang tuangin vantung galkapte makaih hi, cih honglak hi. Vantungmi tulthen tampi te in zui-uh hi. Satan’ gitlohna tunga thuakkeikaina kiciangtan ta hi. Tua in huatna, ngonghtatna, hiamgamhna, namkhat leh namkhat kithahna, mi khat le khat kithahnate’ tawpna hiding hi. Tua in kiliamsakna, dahna, leh satan in eite hong thuaksakna hangtuamtuamte abeina hiding hi.

Natsakna om nawnlo ding

Laisiangtho’ hong kamciam in, mawhna hong thokik nawnlo ding hi (Nahum 1:9). Pasianin mihing akipan nakhempeuh bawlthak ding hi. “Amaute mitpan khitui khempeuh nulsak ding hi. Aluinate maimang khinta a, sihna, dahna, leh natna cihte omnawn loding hi” (Mang 21:4).

Nathuak laitak Topan hongkem mah hiam? Aman hongkeem hi. Aman nang mimal ading leh atang zaizaw in semmah hi.  Aman hong kamciam a, “note kong nusia ngeikei ding hi, kong tamasak ngeikeiding hi, hongci hi” (Heb. 13:5).

Unless otherwise noted, Scripture taken from the New King James Version®. Copyright © 1982 by Thomas Nelson, Inc. Used by permission. All rights reserved.

Cover image: ©delihayat/Vetta/Getty Images