Zomi – Steps to Health

CIDAM NADING KALSUANZIA

Cidamna in natna neilo, cih hibek lo hi. Ahoih cidamna in pumpi, lungsim, mitawh kikholhna, khalam nunzia avekin huam hi. Laisiangtho in hih pen nuntakna “cingtaak” (bucing) (John 10:10) leh Pasianin eite ading a hong deihsak nuntakzia ahi hi.  Pasianin “nangmah in nopsakna leh cidamna nangah nading thu ka ngen hi” (3 John 2), ci hi.

Acingtaak nunzia ihneih nading leh ih cidam zawk nadingin, Pasianin kalsuanzia pawlkhat hongpia hi. Natna leh tuahsiatnate ei’ khaamtheih hilo hi, ahizongin  tuate atawmzawk nading leh cidamna a khantoh nading ei’ teel theih ahi hi.

Tuni-a kipan ihcidam zawk nadingin zatpah theihding kalsuanzia namgiat om hi.

Kalsuanzia  1. Cidam nading akisam nek leh dawn (Nutrition)

Nanek an in nuntak anuam sakding hihtheihna leh thuakdante hong makaih hi. Tua hi a, anhoih bawlin, cidamna tawh kituak ante ihteel theihding thupi hi.  Pasianin Eden huanah ahongpiak masak ante in singgahte, atangnei ante (vaimin, taang, buhtang), ahawngkhauh tang, khaici tangte ahi hi. Mawhna sungah  atuk khitciangin, ganhingte an ahi kungneu, lopate nekdingin kibehlap hi. Alungluthuai khatah, Pasian’ hongpiak ante sungah, sihui akhakthei thau apiangsak  ganhing pan kingah ante (sa) kihel lo hi.

Nitumna lamte’n mehteh mehgah nekding hanciam le uh, mitampi athat  sihui  khauhsak, sihuikhaknatna  hong kiam zaw ding hi. Mipilte’n akankan ciangin,  Pasianin piancil lai a mihingte apiak singgah leh mehteh mehgah ante  ahoihpen ahihna  hong mukhia uh hi (Piancil 1:29, 30). 

Kalsuanzia 2. Cidam nading Pumpi Thasaanna (Exercise)

Na pumpi agamtang dingin kibawl hi. Pumpi kidomkimna pen, nisim ihsep ding khempeuh cidam takin ihsep zawhna ahi hi. Nisim pumpi thatang saanna-in pumpi kilamzia ahoih piangsak hi.  Lampaina in thasanna akipat nading ahoihpen hi a, damtak leh hunman takin khanto semsem ding hi.

“Thuakna omlo in ngahna omlo,” cih kammal naza ngeiding hi, ahizongin maan khin lo hi.  Thuakna ih cih in a vallua asepna lak hi.  Thatang saanna na bawlciangin na nawhnak  ziahziah dong hih inla , naklah zah dongin bawl ke’n.  Nikhat minit 30 bang bawlding hoih hi. Kalkhat  thumvei pan ngavei bawlding hoih hi.

Thatang saan hunding na ngah hiam? Kiim leh pam ah mite in TV, video kimawlna leh internet te ah hun beisak uh hi.  Tua TV, video kimawlnate khakin ,nahun valte cidam nading thatang saanna in zangin. Thasaanna in napumpi gihna kemcing dinga, lungkhamna leh natna ngah nading pan hongdal hi. Thatang saanna in nuntak sau sak hi.

Kalsuanzia 3. Tui (Water)

Tui in nuntak nading alo-theilo khat ahi hi. Mitampi in dangtakna pen tui bangzah dawnding, cih tehna in nei a, ahizongin dangtakna in, ih pumsung pan tuikang ahihlam lahkhiatna hizaw hi. Nisimin, ihzun, ek, khua-ul, leh akhu lengkhiate hangin ih pumpi sungpan tui ihsum den hi. Tua ahihmanin khangham khatin nikhat in tui hai 6 dawn dinga, kimawl laitak leh, khuahun asatluat ciangin atamzaw dawnding hi. Tui pen ih pumpi tuite , pumpi lumnate akemcing ding leh ihkalte in hoihtak  na asep nadingin thupi hi. Tua hi-a tui akicing in dawnin. Tui- in alumdat neilo a, dawnding hoih hi. Coffee, soda, leh zute in tuitang a zatding hoihlo hi. Tua te in na cidamna siasak hi. Coffee dawnna in ihpumsungah tui abehlap sangsik-in aomsa kiamsakzaw lai hi, ci –in mipil te’n mukhia hi.

Kalsuan 4.  Nitang (Sunshine)

Nitang in na cidamna asukha khat ahihlam na ngaihsun khangei hiam?.  Phalbi sungin nite  tomin, guahzu  meikai-in,  lungkiatna leh lungzinna bangzahin kingahbaih hiam, cih naphawkkha ngei hiam? Nitangin pumpi ading vitamin D piakhia hi. Nitangin silesa apiangsakte kemcing in, hormones leh samalte khangto sak hi.  Guh leh tang, haate akhauhsak calcium te pumpi in hup in, ih theihtheihna sazangte leh natnadal silesate damsak hi. Nitang tamlua thuakna in cidamna susia thei a, vun cancer piang sak thei hi. Tua hi a, nisa sungah sawtpi omna kidawm in, nisa pan kidal nading lukhu leh atuamtuamte zangin.

Kalsuan Zia 5. Kikhaikim (Balance/moderation) Nuntakna

Akikhaikim nunzia in cidamna tawh kituak nunzia ahi hi.  Tuabang nunzia in nakhempeuh ah hoihbek (khengval lo) ding cihnopna hikhin tuanlo hi. Cidamna asusia thei nunzia te ih pelh laitak in, na hoihte leh nunzia hoihte in cidamna khangto sak ahihlam theihkhialh lohding kisam hi. Akikhaikim nuntakna in acingtak nuntak khantohsak nading ahi hi. Gentehna: Antamlua nekna in gilsung buaisak a, thauluatna piangsak hi. An ahoihkhom nekloh na-in vitamin kicinglo ahihkeileh puksihna piangsak hi. Avallua a nasep na-in husam sak, siatna piang sak hi. Sepding zah seplohna in, thadahna leh sazangte thanemna piangsak hi.

Kalsuanzia 6. Huih (Air)

Huih in adangdangte sangin thupizaw phadiak hi. Huihdiik lo-in minit tawmno sung nangawn kinungta theilo hi. Tua hi a, ihdiik huih ie hoihna, sianthona zong thupi mahmah hi. Huihnin in natna leh sihna piangsak thei hi. Naungekte, khanghamte, lungtang adamlote, tuap adamlote, huihnin lakah sawtlua om leng lauhuai phadeuh hi.  Zatep meikhu in huih ninsak phadiak hi.  Zakhu in lauhuai in, sihna dong piang sak thei hi. Cidamna kepcing nadingin huihsiangtho tampi dik ding ahi hi.

Kalsuanzia 7. Tawlngakna (Rest)

Mipilte’ kankhiatna ah, Khangham khat in cidamtakina agamtat zawh nading in zankhat nai 8 ihmut hun kisam hi. Ihmut khamlohna in nakpitakin buaina, haksatna, natnate piangsak hi. Ihmut khamding akisap banah tawlngakna zong kisam hi. Pasian’ bawlsanate etna, mualdungte leh luigeite ah lampainate in hong nosuaksakin ih lunggimnate zong kiamsak hi. Pasianin tawlngakna ih kisaplam hongthei ahihmanin, kalkhat ah ani sagih Sabbath ni ih tawlngakni dingin hong pia hi (Paikhiat 20:8-11).

Kalsuanzia 8. Pasian Muang in (Trust in God)

Khalam cidamna in pumpi cidamna sangin thupi zaw hi.  Lungzinna, lunghihmawhna, leh mawhnate in nanuntakna damdam in eu khia a, natna piangsak hi. Nang hongbawlpa Pasian muang in, na nuntakna  pialecin  lungzinna , lunghihmawhna, leh mawhnate in ahoihlo a hong huzapna ah hong gualzawh pih ding hi. Nisimin Pasian’ kammal—Laisiangtho simna in Pasian  namuanna  khangto sak thei hi  (Rom 10:17).

Topa in ci hi, “Topa amuang mite atha uh dimkik dinga, muvanlai  bangin khatawh lengto-in, amaute  tainapi-un tawllo ding a, amaute lampai napi-un gimlo ding uh hi”(Isaiah 40:31) Topa muanna in  cidam nading  athupi mahmah hi hi.

Thukhupna

Hih cidam nading kalsuanzia 8 te in oltakin huzaplian nei hi. Tuni-in na nuntaknaah zat  kipan lecin, kilamdanna namu ding hi.