Zomi – What is Jesus Doing Now?

LAMET DING AOM HIAM?

Tulai Leitung buainate akisel omlo hi. Thuthang tangkonate in mat leh zet in khuahun siatna te, mulkimhuai kithahnate, tatsiatnate, gambuainate, sum leh paai dongtuahnate thusia vive suahsuah uh hi. Lungtangnatna, sikhumnatna, cancernatnate khangnote nangawn aneihna thu ih zaza hi.Hihbang buaizelzulnate panin ih paikhialhloh nadingin ih kikepzawh ding ihtup ahi hi.

Nang leh na innkuanpihte in hihbang buaina panin nataikhiat zawh nading na hanciam hangin, atamzaw innkuante hih buaina tawh kipaikan lai hi. Pa atamzawte in bill tuamtuam apiakzawh nading ahanciamna uh tawh atate tawh hunawng tamzat manlo uh hi. Nu tampitak inn nasep vai tuamtuam tawh nadang bangmah kiman tuanlo uh hi. Tawlkhat khit ciangin lunggimna tuamtuam ngaihsut kholhloh in kingah hi. Naupangte khantohna manlang mahmah hi. Sangah huntampi zangin, zongzatna hoihlo lamah zong khangto uh hi. Naupang tampite in game kimawlna in nai tul tampi hun zang uh hi. Tua in gamtatsiatna in thuzawh ta hi. Khangnote zong internet etna pan in muhhuai lote mu in, numei pasal omkhopna tawh kisai mawhding a ze-etna thuakin ahun hoih pente uh susia khin ta uh hi. Nu leh Pa te’n bang ci mapan ding? Ih naupang ten hih leitung bang gamhoih pia thei ding hiam? Mailam ading lametna takpi a om mah diam?

Genkholhnate leh Kamciamte

A zenzen in Leitung nuntak tualniam/haksa na kisak leh atunglam et toh ding na ki phawk kha hiam? Alamdang hehpihna Laisiangtho ah genkholhnate in hong kawkmuh in lammaan hong hilh ding hi (2 Tim 3:1-5), mikhempeuh adingin lametna om hi. Tua amanpha thu sungah ih Leitung ki ukzawh lohnate ih Topa in hong vaihawmpih ding hi. Pasianin atapa Jesu Christ hih Leitungah hong sawl ding a, akhial khempeuh lammaan lakin ahoihlote susia in, tawntung daihna omsak ding hi. Ih kim ih pamah genkholhnate tangtun khin ta hi ( Luke 21: 25-28). Tua ni hong naita hi.

Tuma kum tulnih lai in, Jesu in eite mawhna tang dingin singlamteh tungah thahna hong thuakin kivui a, thokik in van hong kahsan hi ( Mark 15 leh 16). Hihte khempeuh ma in, Jesu in ei adingin kamciam hong nusiat hi.

“Note lunghimawh kei un. Pasian um unla, Keizong hong um un. Note’ om nading mun abawlkhol dingin apaiding ka hi hi.  Ka Pa’ inn sungah omna tampi om hi. Aomlo ding hileh hih bangin thu ka honggen kei ding hi. Kei pai-in note’ om nading mun ka bawlkholh khit ciangin Keima omna munah note na omtheih nadingun note ahong ladingin ka hong paikik ding hi (John 14:1-3).

Na phawkkha hiam? “Ka hong pai kik ding hi”, ci in gumpa in hong kamciam hi. Koi bangin hong pai ding hiam? Mikhat peuh kiangah sunglut in hong pai ding maw? Dawi bangin hong kilang ding maw? Hilo hi, Laisiangtho in kiciantakin hong gen hi. Jesu hong paikik  ciangin zin nakpi lingding a, aw ngaih mahmah tawh, Ama hong paikikna hangin Leitung mun tuamtuamah asisate amau’ pumpi tawh hong thokik ding uh hi.

Paul gelhna ah: Pasian’ thupiakna awging lianpi, vantungmi mangpa’ thugenna, leh Pasian’ peengkul hongging ding a, vantung panin Topa mahmah hong paisuk ding hi.Tuaciangin tua hun laitakin anungta lai eite pen vankimlai-ah Topa adawn dingin Amah a um asisa mite tawh hong kilakhawmin, Topa tawh ih omkhawm tawntung ding hi,” cihna ahi hi (1 Thessaloni 4:16, 17).

Paul laikhakna tungtawnin, Leitungah Jesu nihveina hong kumkik  ciangin, Amakhe in Leitung sukha loding hi. Pasian’ mite Ama kiangah lato ding hi. Tua ahihciangin mikhat peuh in hua lai ah Jesu om, hong cihleh umkha kei un. Amah hilo ding hi (Mate 24: 24-27). Akicianzaw in Peter  agenbehna ah: “Ahizongin theihkholhlohpi-in guta bangin Topa hong paiding Ni hongtung ding hi. Tua Ni ciangin nakpitakin aging in leitungnate maimang sakin, vantungnate mei in kangtumin maimang ding a, leitung leh atunga om na khempeuh amangthang ding hi. Eite in Pasian’ hong ciamsa, thumaan bek akizat nading mun vanthak leh leithak angak ih hi hi (2 Peter 3:10, 13).

Avekpi in Kibawlpha

Ih theihdingin, Vantunggam in lei-a buainate avengsak ciang ding bek hilo hi. Pasianin kilem nading in, United Nations, leitung kumpite, mihing zuihding thukhamte, Palikte, akhialthei lei mite tawh leitung siatna aveng dingin kilemna bawllo hi. Atawpna ah tuate tawh kiteh theilo hi. Siatnate tuimang ding a, siatna khempeuh leh migilote kangtum ding hi. Tua khit ciangin Pasian in vanthak leh leithak bawl ding a, tua ah misiangthote teng ding hi. Tu in hih mangngilh ken:

“Amaute’ mit panin khitui khempeuh nulsak ding hi. Aluinate maimang khinta ahihmanin sihna, dahna, leh nasa in kahna cihte om nawnlo ding hi,” a ci hi. Tua ciangin tokhom tungah a tupa in, ‘Tu-in na khempeuh athakin ka bawl hi,” ci hi. Tuaciangin, “Hih thute thumaanin muantaak ahihmanin lai-ah gelh in,” hong ci lai hi (Mangmuhna 21:4,5).

Bangzahtak in lawphuai hiam? Lametna omlo kimlai ih vekpi adingin lametna hong koihsak hi. Nisim naisimin alamdang athak sinding tampi kawmkal pan Pasian mitsuan ciatni. Lungkia kei inla, Laisiangtho sim in. Thungen inla namawhna kisik in. Jesu muangin, Aman hong maisak in hong huh ding hi.

Lamkhat panin, khialhna bawllo in na om zongin, Jesu hong paikik mateng, na nuntakna in paakhuan ah picnic pai bang lo ding hi. Lucifer in ih muhlohna munah na naksep mahmah cih thei in (Mangmuhna 12:12). Laisiangtho in  zong hong hilhkhin hi. Tanglai a ih galpa in Jesu kineih in ama vangliatna tawh lim leh na lamdang tuamtuamte zangin hong pai ding hi. Gilopa khemsa in takei in.

Khialhtheihnawnloh hun hong tung ding hi

Pasian’ kammal kician hi. En in, Jesu meitung tuangin hong pai ding hi. Mit khempeuh in muding hi (Mangmuhna 1:7). Jesu mahmah in agenkholhna ah a Pa vangliatna leh vantungmite tawh meitung tuangin hong kumsuk ding hi (Mate 16:27). Kkuamah in pelhthei lo ding hi. Vantungmite cinna tawh kumpite Kumpi leitung hong pai kik ding hi. Ama hong paikikna kuama kineihtheih ding hilo hi. Satan’ kineihkhemna tawh khial kha kei ni.

Kongit Lawm aw, na lungtang kisit pha in, Leitungah buainate avengsak theiding leitungnate hilo hi. Pasianin ih haksatna, ih gimna, ih buaipihnate hong thei hi. Lungmang kei un. Pasianin mimal khat ciat tha hongpia hi. Amanin akamciam pelhlo ding a, hong paikik takpi ding hi (John 14:3). Tua ni matengin, na upna khahsuah kei inla lenkip in. Nalawm nagual nameltheih tanau te Pasian hehpihna angah nading thunget sakin. Ahoih Pasianin na thungetna hong dawng ding hi. Ama huhna tawh nakim a khuamialpite hong vak ding hi. Amial zanin atangzaw Aksi kimu hi.

Jesu hong kumkik mateng, Topa sungah thahat in (Ephesian 6:10). Ih kumpi Jesu hong paikik ciangin Amah mah in Leitungah tawntung kilemna gam hong phut ding hi.

Tua lai ah nang na om diam?